A Xunta impulsa o Museo Diocesano e Catedralicio de Lugo

O Museo Diocesano e Catedralicio de Lugo abordará obras de acondicionamento e reabrirá as súas portas proximamente. A Consellaría de Cultura anunciaba o pasado venres o acordo de colaboración coa Diócese para un proxecto que contará cun orzamento total de 332.311,46 euros, dos cales a Consellaría achegará 250.000. O acordo prevé o acondicionamento deste centro da Cidade da Muralla para a almacenaxe e exposición de pezas. Ademais, a Diócese elaborará un inventario dos bens que se atopan depositados no territorio que administra e deberá "encargarse da negociación coas parroquias do traslado ao Museo daqueles bens do patrimonio moble máis valiosos" coa intención de "asegurar a súa transmisión ás xeracións vindeiras". A diócese de Lugo cobre 1.263 parroquias entre as provincias de Lugo, A Coruña e Pontevedra.