Sete compañías galegas e once foráneas compoñen o programa da nova edición do Festival Internacional de Teatro de Ourense. A Cidade das Burgas acolle a partir do vindeiro 2 de outubro e ata o día 16 este encontro que organiza Sarabela Teatro e dirixe Ánxeles Cuña. Esta edición presta unha especial atención á creación escénica feminina, coas mesas de debate A dramaturxia feminina en Galicia, A creación feminista en Galicia e Ser actriz. A tiranía do perfil. Ademais, diferentes obras cunha importante presenza feminina agruparanse no epígrafe Mulleres Creando.
Entre as novidades máis destacadas desta xeira está a estrea absoluta de El cuello de la jirafa de Matarile Teatro ademais de propostas como A órbita dos lucecús de Lucecús Teatro, Matrioshka Teatro con C’est la vie, Funboa Escénica con Sushi gratis ou Elefante Elegante con Kassa. O Auditorio Municipal e o Teatro Principal acollerán o groso das actividades que inclúen tamén cursos de formación, un coloquio sobre festivais escénicos e encontros de profesionais do sector.
