A Illa de San Simón acolle a quinta edición do encontro Nethinking

A Illa de San Simón acolle os días 29 e 30 de maio a quinta edición do encontro Nethinking que reunirá a destacados expertos en comunicación e redes sociais para debater e transmitir coñecemento sobre o contorno dixital, os novos medios, redes e modelos de negocio en torno aos contidos dixitais. Ao igual que nas anteriores edicións, o foro será retransmitido en directo por internet e aberto á participación a través de Twitter.



Despois de catro edicións, Nethinking consolídase como un referente nos encontros de bloggers, expertos en redes sociais e comunicadores. Nesta quinta edición, organizada pola Fundación Illa de San Simón, "seguirase reflexionando sobre os efectos dunha das revolucións tecnolóxicas máis decisivas da historia da humanidade nas nosas vidas, no noso traballo, na nosa creatividade, na nosa linguaxe e no noso modo de relacionarnos".

Este encontro contará coa presenza de especialistas en redes sociais e contidos dixitais como Antonio Delgado, xornalista e blogger especializado en tecnoloxía, medios e sociedade; Eduardo Arcos, fundador de Hipertextual, a rede de medios dixitais máis importante de Latinoamérica; ou Estrella Montolío, Catedrática de Lingua, investigadora e experta en linguaxe en contextos profesionais; entre outros.