A Real Filharmonía actúa no Concerto das Letras do Consello da Cultura

Na traxectoria cultural de Filgueira Valverde a música sempre tivo un protagonismo destacado sendo o impulsor da recuperación do Conservatorio de Pontevedra. Por iso o Consello da Cultura conmemora o Día das Letras Galegas organizando o Concerto das Letras Galegas, que terá lugar o sábado 16 no Auditorio Sede Afundación de Pontevedra ás 21 horas. O concerto correrá a cargo da Real Filharmonía de Galicia coa participación da Sociedade Coral Polifónica de Pontevedra, baixo a dirección de Maximino Zumalave. As entradas pódense retirar nos despachos de billetes das sedes de Afundación.


Desde hai cinco anos o Consello da Cultura Galega organiza o Concerto das Letras Galegas que naceu para xuntar música, poesía e palabra arredor da figura homenaxeada en cada edición. No recital do sábado estréase unha obra de Xavier de Paz sobre textos de Filgueira Valverde.

Nesta iniciativa, que busca potenciar a dimensión conmemorativa, reivindicativa e festiva da xornada, a soprano Carmen Durán e o barítono Gabriel Alonso Díaz interpretarán obras de Joly Braga Santos, Xosé Castro Chané, Antonio Iglesias Vilarelle e Xavier de Paz, partituras compostas sobre textos de Rosalía de Castro, Manuel Curros Enríquez e Xosé Filgueira Valverde.

Música e poemas
Esta nova edición do Concerto das Letras segundo o presidente do Consello da Cultura Galega, Ramón Villares, retoma "as pegadas dun proxecto moi frutífero, aínda que efémero no tempo, como foi o Festival da Canción Galega, desenvolvido nesta cidade entre 1960 e 1967. Un encontro que garda certos parecidos co que hoxe nos reúne e que no seu momento brindou a oportunidade de dar partituras de calidade a poemas en lingua galega e no que Filgueira Valverde tivo moito que ver".