«Temos pensado pasar un tempo indeterminado de reflexión e renovación de fondo de armario». Así anunciaba o dúo Grampoder, formado por LeRoi e Martin Wu, antigos membros de The Homens, a súa despedida. Tres concertos a finais do pasado mes de marzo foron polo momento os últimos do proxecto, que deixa como agasallo final para os seus fans o «mini EP» Tigerland. Dous temas que o grupo gravara a mediados do pasado ano nos estudios A Ponte de Compostela.
