Ilustracións de Y se hizo la luz
O ilustrador cordobés Miguel Cerro resultou onte gañador da VIII edición do Premio Internacional Compostela de Álbum Ilustrado. O xurado seleccionou a súa obra, presentada co lema Y se hizo la luz entre os 340 orixinais recibidos desde 20 países. A "coherencia, o estudo minucioso dos personaxes, o colorido e a composición" da obra e mais o seu tratamento de temas como"o valor da solidariedade, daquel que sempre axuda os demais e segue crendo no colectivo", así como "o afán de superación e a busca da felicidade inmaterial" valéronlle ao autor os 9.000 euros de premio e a publicación da obra na editorial Kalandraka, que convoca o galardón canda ao Concello de Santiago.
O xurado tamén declarou finalista a obra presentada por Ana Rita Pinheiro Marques dos Reis, de Tomar (Portugal), Anabela, a pinguim friorenta e outorgoulle unha mención especial ao traballo ¿Amigos?, de Anabel Fernández Rey, de Bos Aires (Arxentina).
