O vindeiro venres 27, a libraría compostelá Kómic acolle a presentación de Perlas del infierno. Esta banda deseñada abstracta de Begoña García Alén é o terceiro lanzamento da editora viguesa Fosfatina, que continúa a súa traxectoria a prol da novena arte máis vangardista que se fai no país. Canda a este, a editora presentou recentemente o volume Infraluminosa/Laminada unha obra dupla na que Berto Fojo e Andrés Magán presentan as súas visións complementarias do universo de Villa Luminosa.
Pola súa banda, Demo Editorial anuncia para o vindeiro mes de marzo o lanzamento de Destino Hërgüss, a agardada novela gráfica que Manel Cráneo completou grazas a unha intensa campaña de crowdfunding. Canda a esta, o selo lanzará A deserción de Stalin, primeiro traballo de Tomás Guerrero, que nos trae un relato inusual sobre os espías da guerra fría.
