A Fundación Galicia Obra Social (Afundación), presentaba onte o seu Plan estratétixo para o período 2015-2019, para o que contará con 125 millóns de euros. Segundo adiantou Miguel Ángel Escotet, presidente da entidade, a formación orientada á empresa e á innovación será un dos eixes fundamentais de traballo, e completarase con propostas extracurriculares vencelladas á cultura para etapas infantís e xuvenís. Outra grande liña de acción centrarase no envellecemento activo, para o que se promoverán programas de voluntarido entre os máis maiores e se desenvolverán propostas de cara a mellorar a comunicación interxeracional.
En canto á programación estritamente cultural, Afundación asegura que promoverá "unha actividade que axude a fomentar o coñecemento e o desenvolvemento persoal", na que se primará "a calidade fronte á cantidade". O traballo de artistas galegos e a colección de obras de arte da propia entidade preséntanse como protagonistas destacados neste ámbito.
