Aporía leva os seus Trinta e tantos ósos a Sevilla

A primeira montaxe da nova compañía Aporía Teatro, Trinta e tantos ósos, foi seleccionada para participar no CENIT (Certamen Internacional de novos investigadores teatrais) que se celebra en Sevilla. Aporía porá en escena a súa obra o vindeiro 31 de outubro, na que será a súa segunda representación lodo da estrea no Festival Internacional de Teatro de Ourense o pasado 15 de outubro. Diana Mera dirixe esta obra na que tres mulleres na trintena "cansas de vivir agochadas baixo carcasas prefabricadas, adoptando condutas alleas, deciden transcender a pel e a carne a través da figura mítica da Loba, para chegar aos seus ósos, á materia máis elemental, onde se inscribe a súa historia persoal e colectiva e se atopa, desterrado, o seu potencial máis vital e salvaxe". A montaxe poderá verse en Compotela o vindeiro tres de novembro no marco do encontro Galicia Escena Pro.