Colmeiro protagoniza a nova exposición do Museo de Belas Artes

O Museo de Belas Artes da Coruña escolle Colmeiro como grande proposta expositiva para este verán. Ata o vindeiro 26 de outubro pode verse Manuel Colmeiro 1901-1999, un proxecto que parte de tres estudos inéditos realizados polo pintor nos anos trinta para un mural para analizar a súa evolución "desde unha pintura simbólica a outra en que prevalece a autonomía da pintura sobre o tema". Temas recorrentes da obra do artista como o nu, a paisaxe, a natureza morta, a muller campesiña ou o autorretrato poden contemplarse na mostra.