A Deputación da Coruña daba a coñecer onte o resultado da IX Edición do Premio Castelao de Banda Deseñada. O debuxante vigués Kiko da Silva fíxose cos 6.500 euros do premio desta xeira e verá publicada a súa obra O inferno do debuxante. O traballo de Da Silva narra os problemas de Manuel Pardo, un debuxante que nunca consegue publicar porque descobre que outros tiveran antes as súas mesmas ideas.
O xurado apuntou a alta calidade das obras que se presentaron a esta edición do premio, un total de trece que supoñen unha marca na historia do certame. Diego Calvo, María Padín, Carlos Portela, Ángel de la Calle, Miguelanxo Prado e mais Mercedes Fernández-Albalat foron os responsables da selección.
