Arte de fuga é o título do poemario co que o vigués Carlos Penela se impuxo no XVII Premio de Poesía Miguel González Garcés que convoca a Deputación da Coruña. O xurado destacou “o rigor na elaboración do conxunto, a súa capacidade de reflexión metapoética e de aprehensión do mundo pola linguaxe, con moi suxestivas referencias culturais da tradición europea”. O gañador levará 6.500 euros de premios e verá o seu traballo editado. O xurado declarou tamén como finalista a obra Amado estranxeiro de Baldo Ramos, que será tamén editada.
En paralelo, Yolanda López López fíxose coa segunda edición do premio Manuel López Ardeiro, pola súa obra Tántalo. A gañadora recibiu 150 exemplares da súa obra da man do Concello de Negreira, que convoca o galardón.
