Tres meses despois do seu nomeamento, David Barro, flamante director da Fundación Luís Seoane, presentaba a súa proposta de programación para esta temporada. Unha nutrida presenza de traballo galego, que Barro cifra nun 70%, será a marca da casa canda ás colaboracións con outros centros. Precisamente unha exposición de Ángela de la Cruz, "considerada a artista galega máis recoñecida a nivel internacional", segundo o director, preséntase o vindeiro mes de febreiro como a grande aposta da nova temporada. Canda a ela, o portugués Julião Sarmento abrirá o vindeiro 3 de xuño o calendario expositivo. Nomes como Eugenio Granell, Tatiana Medal, Misha Bies Gola, o alemán alemán Günther Förg ou a brasileira Sandra Cinto fan tamén parte do programa. En paralelo a estas propostas, Barro sinalou que se desenvolverán colaboracións con artistas novos do país "que producirán mostras específicas para a fundación relacionadas con diversas vertentes da figura de Seoane".
