Galicia acollerá 12 feiras do libro en 2014

O calendario das feiras do libro amplíse en Galicia por segundo ano consecutivo. Ribadeo incorpórase á lista de vilas que acollen esta inciativa da Federación de Libreiros. Logo do relanzamento do pasado ano, cun novo formato de postos e de actividades, o programa de feiras deste ano comezará en Compostela o vindeiro 26 de abril e chegará a 12 vilas e cidades. Segundo sinalaron esta mañá a presidenta da Federación de Libreiros, Pilar Rodríguez e mais o vicepresidente, Antón Pedreira, en total son 7 as citas que se organizan co apoio da Consellaría de Cultura e cinco máis as que a Federación aborda co apoio de concellos.

Precisamente, a presidenta dos libreiros incidiu en que este ano se multiplican as colaboracións con diferentes entidades para garantir a programación dos eventos. Así, intensificarase a presenza das bibliotecas nodais nas feiras. Ademais de dispor dun posto propio, estes centros trasladarán durante un día todas as súas actividades a este espazo.

Canda a isto, a Federación aposta por manter o formato de feira do pasado ano e en "afondar nel e melloralo", segundo apuntou Rodríguez.


Datas das Feiras do Libro 2014

Santiago: 26/04-04/05
Pontevedra 06/05-11/05
Lugo: 13/05-18/05
Vigo: 23/05-01/06
Ourense: 03/06-08/06
Ferrol: 11/06-15/06
Ribadeo: 17/07-20/07
Rianxo : 24/07-27/07
A Coruña: 01/08-10/08
Viveiro: 14/08-17/08
Foz: 21/08-24/08
Monforte: 27/08-30/08