Chega o Galician Connection 2014

A Cidade da Cultura acollerá entre o catro e o seis de abril a terceira edición do Galician Connection, o programa formativo para músicos que organiza a Consellaría de Cultura. O encontro que coordina Cristina Pato contará nesta xeira coa participacion de Carles Benavent, mestre do baixo eléctrico, o compositor e clarinetista Kinan Azmeh e mais o harpista Edmar Castañeda. Pola banda galega participan no encontro o pianista Abe Rábade, a cantante Najla Shami e mais o percusionista e educador musical Carlos Castro.

Os interesados en participar compartirán durante o evento os seus coñecementos cos músicos convidados para rematar o ciclo cun concerto. Ademais, o día 4 celebrarase a Xornada Educa, un encontro dedicado a reflexionar sobre a presenza das artes nos sistemas educativos.