O vindeiro 30 de xaneiro, data do nacemento de Castelao, as bibliotecas galegas celebrarán por vez primeira o Día da Ilustración. Esta nova data do Calendario do Libro e da Lectura que promove a Consellaría de Cultura achegará a estes centros de lectura obradoiros de ilustración, gravado ou murais a cargo de creadores como Óscar Villán ou Xosé Tomás, así como a mesa redonda A ilustración gráfica hoxe en Galicia que celebrará na Biblioteca de Pontevedra con Marina Seoane, Almudena Aparicio e Manuel Uhía. Ademais, a Biblioteca Nodal de Vigo acollerá a exposición Vida e obra dos ilustradores en Vigo ata o vindeiro 7 de febreiro, e ese mesmo día o Museo de Belas Artes da Coruña acollerá un encontro con Miguelanxo Prado.
