"Todo tipo de padais, de cinco a quince anos". Este é o público ao que van dirixidos os produtos de Sushi Books, o novo selo editorial de Rinoceronte Editora. A empresa que dirixe Moisés Barcia lanza unha liña que publicará en galego, castelán, catalán e éuscaro tanto títulos propios como traducións de autores internacionais. O proxecto comprende tres liñas, unha dedicada ao álbum ilustrado e outras dúas "intermedio" e "avanzado" para idades superiores. Están xa á venda Xildas Antonio Manuel Fraga Allegue e mais O poder de Amabel de Érica Esmorís, e anúncianse títulos como a serie Caídos do mapa ou o recoñecido O curioso incidente do can á media noite, de Mark Haddon, entre outros.
