A xornada dun obreiro nunha factoría atemporal. Este é o argumento de Operario, a nova obra do coruñés Jano que vai publicar Demo Editorial. O proxecto, que consta de 48 páxinas a branco e negro, mestura "comedia, aventura e drama social", segundo adianta a editora. Co título, Demo abre unha nova colección, Demográfica, na cal se publicarán historias de pequeno formato nas que predominarán as imaxes sobre os textos. Operario porase á venda o vindeiro 1 de agosto e presentarase oficialmente no festival Viñetas desde o Atlántico da Coruña, que está previsto que se celebre entre os días 5 e 11 deste mes.
