O vindeiro 21 de xuño bota o fecho un dos proxectos máis anovadores do panorama expositivo galego. Logo dun ano e tres meses de traballo o Furancho de Arte Contemporánea FAC Peregrina clausúrase de xeito definitivo, "coa profunda satisfacción de ver os seus obxectivos cumpridos e a tranquilidade de haber exercido a súa responsablidade para coa construcción colectiva de coñecemento que é a Arte", segundo explican o seus promotores.
Para marchar con alegría, este espazo organiza a partir das 12 da mañá do seu último día o evento FAC ALL, que inclúe un xantar popular, photocall, sesións de picadiscos e concertos e que se celebrará nas instalacións deste espazo nas aforas de Compostela.
