A capela ardente cos seus restos mortais está instalada no Tanatorio de Boisaca

Tras unha longa enfermidade, o actor Xosé Manuel Olveira "Pico" morreu esta tarde en Santiago de Compostela aos 58 anos de idade. "Pico" foi un dos máis destacados actores galegos destas dúas últimas décadas, cunha extensa carreira no cine e no teatro. Comezou a actuar en 1972 co grupo de teatro Ditea. No cine, as súas últimas películas foron Somos xente honrada (2012, en estrea estes días), Doentes (2011), 18 comidas ou Retornos (2011), ademáis de participar en boa parte das series de éxito da Televisión de Galicia, como Mareas Vivas ou Pratos combinados. A capela ardente cos seus restos mortais está instalada no Tanatorio de Boisaca (Sala 7) e o cadáver será inicinerado na intimidade familiar.

A traxectoria profesional de Xosé Manuel Olveira é moi ampla e extensa na que soubo combinar a faceta audiovisual coa teatral. Arrincou en 1972 co Teatro de Cámara DITEA pero pronto, trala constitución do Centro Dramático Galego, participou en máis dunha vintena das súas actividades. Neste traballo, Xosé Manuel Olveira recibiu catro premios María Casares (1999, 2000, 2002 e 2013) e o Maruxa Villanueva de Teatro (2009). No sector cinematográfico Pico ten traballado con directores galeo scomo Antón Reixa, Héctor Carré, Jorge Coira ou Alfonso Zarauza, como directores do panorama estatal como José Luis Cuerda, Gracia Querejeta ou Alejandro Amenábar. O sector audiovisual recoñeceu esa carreira nos Premios Mestre Mateo 2008 da Academia Galega do Audiovisual (entregados en 2009) recibiu o galardón de mellor interpretación masculina de reparto por Os mortos van ás présas. Pero o seu palmarés é tamén amplo: por Retornos levou en 2011 o premio Mestre Mateo á mellor interpretación masculina de reparto e recibiu o Premio Augusta ao mellor actor no Festival Internacional de Cinema Independente de Braga, Bragacine, polo seu papel protagonista en Simbad.

Xosé Manuel Olveira tamén asumiu postos de responsabilidade no marco do sector e estivo á fronte da Academia Galega do Audiovisual entre 2009 e 2011.