Unha intervención artística reconstrúe a historia da programación cultural e o feminismo

O Furancho de Arte Contemporánea da Peregrina, un espazo de creación situado na contorna rural de Santiago, inaugura esta tarde unha interesante intervención. A proposta de Ania González pretende servir de radiografía e contextualización da (contra)historiografía contemporánea da recepción das prácticas feministas, queer e trans na programación cultural feita en Galicia. E para facelo tira de varios fíos. Dunha banda, dos estudos do proxecto teórico/artístico Archivo T (Genderhacker). Da outra, dunha serie de entrevistas que se realizarán esta mesma atarde a axentes culturais como a filósofa Rebeca Baceiredo, a comisaria Anxela Caramés, a activista Mai ou a galerista María Díaz. As entrevistas gravaranse e despois poderanse descargar.

A actividade titulada “FAC Feminismos” servirá tamén para a presentación de dúas actividades: a peza de videocreación “Armas de mujer”, de Lúa Audiovisual, e máis coa colaboración musical do Sr. Anido (Rafa Anido) que ofrecerá un concerto no que presentará un tema especial creado para FAC Feminismos e baseado no libro da escritora e directora de cine francesa Virginie Despentes “Teoría King Kong” .