Unha xornada analiza como a arte se enfronta ante a crise social

Ante esa situación de crise social, política e financeira ¿cal é o rol que ha de desempeñar a arte?. Non pode ser só un refuxio estético, nin un acicate, nin unha descrición da realidade. Na era do capitalismo global, a arte como movemento, estratexia e táctica, como metodoloxía e pedagoxía pode desempeñar un papel importante e necesario: sensibilizando, visibilizando problemas, construíndo narrativas visuais ao tempo que xerando novos imaxinarios culturais. E sobre isto é do que se falará na xornada Arte e crise social que organiza a Sección de Creación e Artes Visuais Contemporáneas do Consello da Cultura Galega o venres 15. Nomes coñecidos para a arte contemporánea como Teresa M. Vilarós-Soler, Manuel Figueiras ou Miguel Mosquera ofrecerán os seus puntos de vista, nun formado de conversa con outros profesionais como Federico Lopez Silvestre ou Natalia Poncela.