As esculturas de Ramón Conde abren as Torres Hejduk como espazo expositivo

As figuras excesivas, amplas, voluminosas de Ramón Conde (Ourense, 1951) exploran desde a semana pasada novos espazos da Cidade da Cultura. No marco do Plan Estratéxico do Gaiás, que propón potenciar o lugar como espazo para novas creación, insírese a exposición Emoción-Razón: A gran dualidade. Unha mostra que pretende falar das influencias, do papel da convicción, de cómo crear realidades paralelas máis determinantes que o mundo físico.

A exposición está deseñada en relación co espazo físico no que se presenta. Comeza no exterior, cunha reflexión intimista do individuo, que xorde da terra para formar un pórtico antropomorfo nun exercicio introspectivo. Despois, as dúas otrres, unha para ofrecer unha xuntanza de personaxes que escoitan a un líder, creador dunha realidade intelectual que se materializa para eles. Na outra, a escultura para exhibir a influxo emocional duns individuos sobre os outros, onde se plasma o poder psicolóxico como forza determinante do noso comportamento social.
Así, queda completo o círculo, a perspectiva intimista do individuo fronte á forza social. A emoción e a razón, que lle da título a esta mostra que se pode ver ata o vindeiro 9 de xuño (de luns a domingo de 10 a 14 e de 16 a 20 horas).