A Universidade de Santiago podería sumarse á concesión de títulos a aqueles alumnos ós que lles falte algunha asignatura por aprobar da súa carreira. Esta posibilidade xa está en práctica en universidades como as politécnicas de Madrid e Barcelona e estúdiase noutras como a de Vigo.
Por unha materia
A situación daqueles estudiantes que non poden licenciarse por ter unha ou dúas materias que non acadan aprobar pode resolverse se vai adiante a iniciativa que está a estudiar a Universidade de Santiago de Compostela (USC). Trátase de conceder o título a aqueles estudiantes ós que lles falta un número reducido de créditos para completar a súa carreira. Segundo sinalou onte Darío Villanueva, a concesión do título realizaríase mediante unha avaliación global dos currículos dos estudiantes.
Iniciativa a estudio
O Rector da USC, Darío Villanueva, sinalou onte a intención de estudiar o procedemento que xa se aplica noutras universidades españolas coma as politécnicas de Madrid e de Barcelona. As súas declaracións producíronse na xuntanza do Consello Interuniversitario de Galicia que tivo lugar onte en Compostela. Tamén a Universidade de Vigo está a estudiar a aplicación deste sistema, que prevé a creación dunha comisión técina que estudie cada caso polo miúdo.
