Orixinal de Jacobo Fernández á venda
A venda de páxinas orixinais de creadores de banda deseñada galega está nos últimos meses a gañar espazos e preséntase como unha opción para agasallar en Nadal. Así, neste mesmo mes de decembro, a galería 9art de París acollía unha exposición de venda de páxinas orixinais de Tirso Cons. O responsable deste espazo, ademais actuará como marchante das pezas do autor pontevedrés. Máis preto de nós, Jacobo Fernández puxo en marcha recentemente unha páxina na que pon á venda ilustracións e páxinas dos seus diferentes traballos.
Este autores súmanse así a creadores como Martín Romero ou Alberto Vázquez, con material á venda no web Vidas dibujadas. Canda a eles, tamén David Rubín, Xurxo G. Penalta e David Pintor teñen á venda o material que expoñen na mostra Docealcuadrado, aberta na coruña ata o vindeiro 12 de xaneiro.
