Lugo e Ourense toman o relevo dos festivais de clown

Logo da desaparición en Vigo do Festiclown, en febreiro deste ano, Lugo e Ourense toman o relevo deste tipo de eventos. Culturactiva, a empresa que organizaba o desaparecido evento, levará a Lugo os vindeiros 2 e 3 de outubro un Festival de Clown. O evento contará con actuacións galegas como as de Peter Punk, Cê Orquestra Pantasama, ou Os Sete magnificos máis un, que estarán acompañados dos madrileños Kanbahiota Troup e dos brasileiros Teatro do Anónimo. O evento xorde da colaboración entre as Concellarías de Cultura de Lugo e de Ourense, polo que é de agardar unha vindeira celebración do mesmo na Cidade das Burgas, aínda sen data.

No marco do programa celebrarase unha gala solidaria no Auditorio Gustavo Freire, cuxos beneficios irán destinados á organización do FestiClown Palestina 2013.