Catro mozos poñen en marcha Vintecinco.com, unha rede social en galego

Javier, Pablo, Nadia e Óscar teñen arredor de vinte e cinco anos e son usuarios das redes sociais. Precisamente esas dúas características son as que conflúen no seu proxecto “Vintecinco.com”, unha rede social en galego que están a desenvolver. Javier Mahía, voceiro do grupo, asegura “quixemos facer unha rede para mozos e mozas galegas, similar a tuenti e facebook, que ten todas súas funcionalidades pero na nosa lingua e sen publicidade”. Para o proxecto contaron cunha axuda de 4.000 euros do programa Iniciativa Xove da Xunta. O proxecto será público a partir do luns 3 de setembro e confían chegar ao milleiro de usuarios no primeiro mes. Ademais, están a preparar a divulgación da iniciativa nas tres universidades e nas principais cidades galegas.