De aquí a final de ano, celebraranse nos concellos galegos adscritos á Rede Galega de Teatros e Auditorios unhas 324 funcións (221 de teatro, 34 de maxia e outros tantos de música, 24 de novo circo e 11 de danza). Son 61 menos que no mesmo período de 2011, que sumaban 385, o que desde fontes de Agadic explican en parte “pola saída da rede de todos os escenarios vencellados a Novagaliciabanco como o Teatro Colón”. De feito, a Agadic achegará para eses bolos 430.000 euros, 70.000 euros menos que en 2011 e que se corresponde co descenso do número de función. Tal e como establece a normativa da rede, os concellos dobrarán esa cantidade, ao estar cofinanciada ao 50% entre ambas administracións. A segunda xeira de contratación arrincou este luns con dous espectáculos (prevista para o Mago Romarís na Sala Bahía de Foz e e o grupo Treixadura no Centro Cultural Avenida de Rúa) ao corrente de pagamento no primeiro semestre por parte de Agadic.
