Publícanse as intervención do primeiro foro INDCREA

A sede do Consello da Cultura en Compostela acollía esta mañá a presentación de Economía de la cultura y la comunicación en la era digital, un volume que recolle as comunicacións do primeiro foro INDCREA, que se celebrou o pasado ano na Illa de San Simón. Fernando Salgado e Valentín Alejandro Martínez son os coordinadores dun volume que recolle 32 intervencións de investigadores galegos, españois, franceses, portugueses e brasileiros entre outras nacionalidades, a analizar desde diferentes visións a problemática das industrias culturais e creativas.

Segundo explicaron os responsables do proxecto, o volume amosa como está a mudar a concepción das industrias culturais no campo económico. De non se ter en conta como sector produtivo, na actualidade están a pasar a se considerar fundamentais para o desenvolvemento e a innovación. "A cultura e a creatividade amósanse como un factor nuclear da competitividade económica", sinalou Fernando Salgado.

Precisamente a semana pasada remataba a segunda edición do Foro INDCREA. O encontro,promovido polo Consello da Cultura, a Axencia Galega das Industrias Culturais e mais a Fundación Illa de San Simón está a contribuir, segundo apuntou Valentín Alejandro Martínez, a "mudar a percepción sobre a importancia que teñen as industrias culturais e creativas" no noso país.