Arrinca a exposición Gallaecia Petrea

No ronsel das grandes exposicións históricas como Galicia no tempo, promovidas na época da presidencia de Manuel Fraga, hoxe pola mañá arrincou en Compostela a exposición Gallaecia Petrea. Son 341 obras que enchen os 6.600 metros cadrados do Museo de Galicia, un equipo de 76 investigadores e cinco comisarios coordinados por Miguel Fernández Cid. A exposición representa a xeoloxía e as diferentes etapas da Historia de Galicia a partir de obras artísticas pétreas. Nela participaron 91 entidades de Galicia, Portugal, Asturias e León, xa que na exposición inclúense pezas do norte de Portugal e do territorio actualmente asturiano que chega ata o río Navia. A entrada esta fin de semana é de balde.