As Xornadas de Banda Deseñada de Ourense terán unha nova edición este ano. Fronte á retirada de apoio público á súa celebración, a Fundación Benito Losada anunciou que ten preparado un programa para o vindeiro outono e que conta coa presenza no evento de Davíd Rubín, Brais Rodríguez, Lola Lorente, Jacobo Fernández e Miguel Cuba. Ademais, retomarase o certame de banda deseñada vencellado ao evento e haberá unha nova edición do Fanzine das Xornadas.
A Fundación anuncia do mesmo xeito a continuidade do Outono Fotográfico, nunha edición que incluirá a nova sección Outono aberto, orientada a creadores principiantes. A creación dun premio vencellado ao certame, a introdución de novas disciplinas e mais o intercambio con outros países son outras das novidades previstas.
