O Museo Etnográfico Liste reabrirá as súas portas na Cidade Olívica nun mes. Cando menos, así o asegurou o alcalde de Vigo, Abel Caballero, o pasado venres. Segundo Caballero, en canto se aproben as contas municipais para o actual exercicio, previsiblemente a finais deste mes, o centro recibirá os fondos que lle permitirán pagar o seu persoal e reabrir. Ademais, Caballero sinalou que o Liste pasará a coordinar o Centro de Artesanía Tradicional e verá incrementados os seus fondos en 45.000 euros. O Museo fechara as súas portas o pasado mes de xaneiro logo de que as contas municipais non recollesen a asignación económica necesaria para o seu funcionamento.
