Víctor M. Díez, Marcos Lorenzo, Guillermo Ferrández e Karlotti serán os responsables, esta tarde, de abrir a V Semana de Poesía Salvaxe de Ferrol coa lectura da proclama poética deste ano. A lembrar a proclamación da República Española e a Revolução dos Cravos portuguesa, o evento contará este ano coa presenza de autores como Alba González Sanz, Ana Gorría, Tiago Gomes, Felipe Zapico ou Estavo Creus entre outros. Á lista oficial súmanse outros autores que se achegarán á cidade e participar nas actividades. Recitais en bares e pubs, en mercados ou en rúas fan parte dun programa que se prolonga ata o vindeiro sábado. A organización lamentou a falta de apoio municipal a esta nova edición do evento.
