Radiador de Ignacio Pérez-Jofre (2012)
Radiador é o título da exposición que a Fundación Laxeiro lle dedica, desde o pasado día 23 de marzo, á nova figuración en Galicia. Propostas artísticas actuais co denominador común de apostar polo retrato da realidade desde diferentes soportes e con intencións ben distintas. Javier Aguilera, Bosco Caride, Elena Fernández, Germán Pintos, Ignacio Pérez-Jofre, Jorge Perianes, Juan Rivas son os creadores que fan parte desta iniciativa, comisariada por Javier Pérez Buján.
A exposición supón o comezo do ciclo Panorama da Fundación. O proxecto prevé realizar unha serie de exposicións colectivas de artistas actuais con denominadores comúns, coa intención de ofertar un repaso pola situación da creación artística actual en Galicia.
