Foto promocional: Jacobo Gayo
O retorno do artista vigués El Puto Coke ao micrófono despois de seis anos dedicado á produción e ás colaboracións xa está nas tendas editado finalmente a través do seu propio selo LicorKafé. El Puto Coke presenta:Coke Céspedes é o título deste traballo, talvez o máis íntimo e persoal do MC con quince temas de hip-hop gravados nos estudios Abdala da Habana.
A importancia do momento, a reivindicación da independencia persoal e profesional, a actitude revolucionaria, as inquedanzas íntimas e vitais sobre a vida e a morte ou o paso do tempo son temas vivenciais presentes nas súas letras. No proxecto, Coke conta con colaboracións como as de Iván Ferreiro, Wöyza, Dani Reus e o MC galego afincado en Suíza Gran Purismo na parte vocal, e autoproduce once das cancións. Segundo adianta o artista, o proxecto percorre diferentes variedades de hip-hop, “é un traballo no que se funden todas as influencias acumuladas no seu proceso evolutivo”, apunta no texto promocional. Desde tons dos noventa como La vida en directo e Despierta a tendencias máis actuais como as que se poden ouvir no primeiro single ou en Otra letra más. O traballo tamén inclúe unha versión do Hino Galego gravada na Habana, o lugar onde se estreou a partitura en 1907, engadindo ritmos propios da illa caribeña.
