Páxina de O pobre tolo
Salpock, a obra coa que Álvaro López e Luís Sendón quedaron finalistas no Premio Castelao 2010, é lanzamento co que Demo Editorial abrirá, o vindeiro mes de abril unha liña dedicada á ciencia ficción. A obra, segundo adianta á editora, achega "unha historia de acción e aventura nun mundo futuro e post-apocalíptico enfocada a todos os públicos". Na mesma liña publicarase, con certo atraso, o xa anunciado traballo de Manel Cráneo,Destino Hërgüss.
En maio, Inacio e Iván Suárez iniciará con O pobre tolo a colección que a editora lle vai dedicar a Castelao. O volume percorre parte da biografía do galeguista ata o seu desterro en Estremadura, en 1934. A obra, que se supón é a cuarta parte da saga dedicada ao político rianxeiro, fai parte da mesma serie de Titoán, coa que os dous autores gañaron o último Premio Castelao. A edición de O pobre tolo faise en colaboración coa libraría compostelá Kómic, que integra este proxecto nas celebracións dos seus 25 anos.
Os autores do proxecto agardan que Titoán vexa a luz en agosto e prevén un total de oito volumes na colección.
