Novacaixagalicia reúne as súas coleccións de arte en Coordenadas

Coordenadas é o título da que será a exposición permanente do Centro Social de Novacaixagalicia en Vigo. O proxecto, que reúne por vez primeira obra das dúas coleccións de arte das antigas caixas galegas, amosa sesenta pezas nas que se reúne o traballo de artistas novos con clásicos da creación como Lugrís, Quessada, Laxeiro ou Maruja Mallo. A exposición pretende, segundo explica Paloma Vera, responsable de artes plásticas da entidade, "bosquexar, ao longo de catro bloques temáticos, esa identidade de país, esa cultura eminentemente galega que nos define e que nos determina como pobo". O mar, Verde país, Inquedanzas e Escenarios son os catro eixes nos que se estrutura a mostra, que inclúe 25 obras de novos creadores.