“É segundo o autor un pequeño acto de amor ou un berro de medo” explica Xúlio Lago, director de Teatro de Atlántico a propósito da súa última montaxe E.R. Algún día traballaremos xuntas, a adaptación ao teatro galego da obra de Josep Benet i Jornet que no seu momento interpretou Teatro Lliure. O mundo do teatro é un dos envoltorios dunha historia que protagonizan catro mulleres que contan a súa relación co oficio e, a través disto, “van trazando o seu perfil humano, os seus dramas familiares, as súas paixóns, as súas frustracións ou a súa maneira de afrontar as dificultades da vida”, segundo explica o seu director Xúlio Lago. O espectáculo inclúese dentro da Mostra das Artes Escénicas (Teatro Principal, 18:30 horas).
