As preto de 5.500 obras de arte, na súa maioría cadros, que compuñan a colección Caixanova, pasarán a mans de Obra Social de Novacaixagalicia. Pola contra, os fondos artísticos da colección Caixa Galicia, preto de 1.500 obras, quedarán en mans de NCG Banco, a nova entidade financeira que resultou a fusión e bancarización das dúas caixas galegas. O feito de que os fondos correspondentes a Caixa Galicia fosen adquiridos con fondos financeiros está detrás da decisión, segundo explican La Opinión e Faro de Vigo. Os fondos que integran a colección Caixanova inclúen títulos de Castelao, Sotomayor, Carlos Sobrino ou Urbano Lugrís entre moitos outros autores galegos. En Caixa Galicia atópanse sinaturas destacadas do século XX como Picasso ou Dalí.
O novo banco pasará a xestionar tamén algunhas das sedes que ata o de agora facían parte da Obra Social das caixas. Así, o novo auditorio e mais o Centro Caixanova de Compostela, o Cine Fraga en Vigo ou a sede de Caixanova na Gran Vía de Madrid pasarán a mans de NCG Banco. Segundo asegurou a entidade, ata 2015 destinaranse 25 millóns de euros a Obra Social, e está aprobado un remanente de 95 millóns máis na última reunión da cúpula de Novacaixagalicia, previa á bancarización da entidade.
