O Congreso Mil e un Cunqueiros culmina os actos do centenario do autor

"Un encontro para lanzar Cunqueiro ao futuro". Así definiu Ramón Villares, presidente do Consello da Cultura Galega, o congreo Mil e un Cunqueiros, que comeza na sede desta institución en Compostela o vindeiro 28 de setembro. A iniciativa, coordinada polo Consello e mais as tres universidades galegas, supón o acto central das celebracións polo centenario do autor mindoniense, e terá sesións tamén en Vigo e na Coruña. Entre outras cuestións destacadas trataranse temas como a presenza da tradición na obra do autor, o seu relacionamento con literaturas foráneas e cos medios de comunicación ou revisións da súa biografía.

Segundo destacou Dolores Vilavedra, membro da comisión organizadora pola Universidade de Santiago, un dos principais obxectivos do encontro é achegar a Cunqueiro a novos ámbitos académicos e internacionalizar a súa figura. Deste xeito, no encontro participarán estudosos chegados do Reino Unido, Francia ou Brasil, así como investigadores galegos que abordan novas perspectivas encol do escritor. Canda a eles estarán presentes algúns dos máis veteráns investigadores desta figura, como César Antonio Molina ou Xosé Luís Franco Grande. Para alén de varias mesas redondas sobre temas fundamentais da vida e da obra do autor, no encontro haberá máis dunha trintena de comunicacións nas que se abordarán diferentes aspectos do mesmo.

Na presentación do congreso Villares chamou a traballar para conseguir unha mellor recepción de Cunqueiro nas novas xeracións.