Viñetas desvela novos convidados e exposicións

Unha exposición retrospectiva sobre os Pitufos, comisariada por Toni Guiral, é unha das principais incorporacións ao cartel de Viñetas desde o Atlántico deste ano. O festival de BD da Coruña continúa a desvelar aos poucos novidades no seu web, entre as que se conta unha nova exposición cos últimos traballos de Juanjo Guarnido como debuxante nas series Blacksad e Brujeando. El arte de volar, último Premio Nacional de Cómic, contará tamén cunha mostra e achegará ao evento aos seus autores, Kim e Antonio Altarriba. Como autor galego convidado este ano, e cunha mostra monográfica, estará no festival o ourensán David Rubín.