Capa do número 31 de A Xanela
Lois Pereiro centra a capa do número 31 da Revista cultural das Mariñas A Xanela, correspondente á primavera deste ano. Ademais, a publicación achega unha cronobiografía e unha selección de poemas deste autor, así como outro de Xulio L. Valcárcel dedicado á figura do homenaxeado no último Día das Letras. A Aula Municipal de Cultura de Betanzos acollía o pasado día 12 a presentación da nova entrega desta veterana publicación, que alberga creacións de prosa, poesía ou banda deseñada de man de autores como Víctor Tizón, Gabriela Rodríguez, Xuxo Torres ou Elena Veiga entre outros. Artigos sobre mitoloxía, historia, etnografía e música completan esta entrega.
