Estación ornitolóxica de Bares. Foto: Xunta de Galicia
Medio millón de aves pasan fronte á Estaca de Bares en dirección ao Oeste, embocando as áreas cálidas do sur do continente e África desde o norte de Europa durante os meses de agosto e novembro. "A cifra total", afirma a Dirección Xeral de Conservación da Natureza da Consellería de Medio Rural, "incluíndo os días non censados e as horas da noite é con seguridade máis alta". Para a Xunta de Galicia, estes datos converten á Estaca de Bares no "mellor destino europeo para observar o paso das aves migratorias". Entre as especies destacadas atópase o negrón común, que é un pato mariño orixinario do Ártico, a pardela cincenta, que visita Galicia dende as súas colonias en Azores e Madeira ou a pardela balear, especie criticamente ameazada a nivel global.
