A Xerencia de Infraestruturas e Equipamentos do Ministerio de Cultura emitiu un informe no que salienta a "inmellorable ubicación" e mais a "calidade arquitectónica e simbólica" da Panificadora de cara a que esta instalación acolla a futura Biblioteca da Cidade. O Ministerio considera ademais que o espazo dispoñible nesta destacada construción supera ás necesidades previstas para o centro, polo que a antiga fábrica podería albergar outras actividades culturais. O Concello, pola súa banda, acolleu con agrado o informe do Ministerio e reafirmou a súa intención en se facer coa correspondente parcela. Despois quedarían pendentes os traballos de rehabilitación do conxunto que se conservaría de xeito íntegro.
