Muralla Dixital é o nome do proxecto que busca aplicar as novas tecnoloxías á promoción da Muralla de Lugo. A iniciativa, que conta co apoio dos fondos FEDER da Unión Europea, conta tamén coa participación das cidades de Santiago de Compostela, Valença do Minho, Monção e Melgaço, e pretende dixitalizar fondos históricos e arqueolóxicos destas urbes de cara a facer recreacións virtuais das mesmas en diferentes momentos históricos. No caso de Lugo, o proxecto contará con 636.500 e desenvolverase ata 2013 con vistas a incluír os seus resultados no futuro Museo Interactivo da Historia da cidade.
