Aínda que sen dar datos concretos, o director xeral de conservación da Natureza, Ricardo García-Borregón, anunciou onte que a Xunta ampliará a superficie da Rede Natura nun 40%. Segundo adiantou onte en comisión parlamentaria antes de fin de ano iniciaranse os trámites neste sentido. Desde a oposición lembrouse que o prazo que deu a Comisión Europea para ampliar os espazos protexidos con esta figura remata o vindeiro sete de decembro. Galicia é unha das comunidades con menor superficie dentro da rede en todo o Estado, e de non a ampliar en prazo pode enfrontarse a sancións.
