Malia a que a achega do Ministerio de Cultura se anunciara xa o pasado mes de febreiro, non será ata comezos do vindeiro ano cando comecen as obras de rehabilitación da Casa do Gobernador, no Castelo de San Felipe. O proxecto ten un prazo de realización de dez meses. Ademais, o alcalde de Ferrol, Vicente Irisarri, anunciou que o proxecto de transformar este recinto nun hotel terá que ser modificado polas esixencias da Lei de Costas. Segundo el, o concello está a valorar a posibilidade de instalar os aloxamentos nun edificio próximo ao castelo, deixando os servizos no interior das murallas.
