Santiago Jaureguízar, xornalista e escritor

O seu blog e as súas columnas téñen sido parte dalgúns dos debates máis intensos da cultura galega nos últimos anos. Para alén do seu recoñecido traballo como escritor, Santiago Jaureguízar ocupa un lugar destacado como xornalista especializado.

¿Cando coñeciches o portal?
Debeu ser cando naceu. Eu xa estaba daquela interesado en Internet. Sígoo desde hai moitos anos.

¿Como o ves na actualidade?
Valoro moito a actualidade que oferta. Un sempre agarda dun organismo como o Consello da Cultura que sexa máis conservador, pero está na vangarda da cultura do país. O portal paréceme moi completo, sobre todo con moita información de actualidade.

¿Que pensas que lle falta?
Non o sei moi ben. Quizais máis referencias ás artes plásticas aínda que en xeral están ben tratados todos os campos da cultura. Tamén se pode botar en falta que haxa un debate máis vivo, pero iso é un problema da cultura galega en xeral. Sería interesante ao mellor convertilo nun referente da cultura a ese nivel, como eran outras webs que xa non existen.

¿Hai algún servizo que empregues habitualmente ou algún contido que lembres de xeito especial?
Sobre todo sigo as novas, a axenda e o resumo de prensa, resúltame moi útil para o meu traballo. Logo tamén me interesan moito as reportaxes, e ollo moito as páxinas de crítica literaria, tamén pola miña implicación na literatura.