A enfermidade e a seguridade social unen nunha sala de diálise a un ex-ionqui en proceso de rehabilitación e a un iupie corrupto. Este é o escenario e o punto de inicio que Rubén Ruibal deseñou na súa “Limpeza de Sangue”. Unha obra coa que gañou en 2005 o premio Álvaro Cunqueiro e dous anos máis tarde o Premio Nacional de Literatura Dramática. A corrupción policial, os negocios, e a vida son algúns dos temas que toca este drama que Espello Cóncavo estreou esta fin de semana en Narón. Foron cinco anos os que se tardaron en poñer en marcha este proxecto, xa que a compañía mesmo chegou a denunciar ao IGAEM (hoxe Agadic) porque as bases do premio Álvaro Cunqueiro implicaba tamén o financiamento da representación.
