A Casa da Xuventude de Ourense concedeu o Premio Ourense de Banda Deseñada -o premio máis veterano de Galicia- á revista Retranca, dirixida por Kiko da Silva. Retranca é unha revista de humor galego que cumprirá en breve tres anos de vida, e ten como obxectivo: "facer humor gráfico sen censura e politicamente incorrecto". Na actualidade, ten periodicidade bimestral. A entrega do premio farase en outubro, no transcurso das anuais Xornadas da Banda Deseñada que organiza a Casa da Xuventude.
